O Diario Oficial de Galicia (DOG) publicou a resolución da Secretaría Xeral Técnica e do Patrimonio da Consellería de Facenda e Administración Pública pola que se acorda a incoación do procedemento para a declaración de Galicia como herdeira ‘ab intestato’ do hostaleiro da Coruña Carlos Llamosas Fernández, falecido en 2017.
Nacido en 1957 en Barakaldo (Biscaia), o seu último domicilio foi na rúa do Orzán na cidade da Coruña, onde rexentou un restaurante de comida vasca.
Tras unha sentenza emitida pola sección 5ª da Audiencia Provincial da Coruña, procedeuse á apertura do procedemento administrativo para a declaración de Galicia como “herdeira ab intestato do causante pola presunta ausencia doutros herdeiros con dereito a suceder preferente ao da Administración autonómica”.
Desta forma, incóase procedemento para a citada declaración e para publicar esta resolución no Boletín Oficial do Estado (BOE); no Diario Oficial de Galicia (DOG) e na páxina web da Consellería de Facenda e Administración Pública.